غاظنى
إعلان البنك المصرى الشهير عن "مرابحة السيارة" التى بها العديد من المزايا، منها
أنها مطابقة للشريعة الإسلامية ويتم مراقبتها بواسطة "هيئة شرعية" ... وذلك طبعا
حتى تضمن ان تصلك السيارة حلال حلال حلال بدون اى شبهة حرمانية.
وبدلا من أن اكتم غيظى فيطق عرقى او تقع الشعيرات المتبقية فى احد مربعات الغابات
الكامنة فى صلعتى الصحراوية ... قررت اتصل بالبنك "الملتزم" هذا حتى اعرف اصل
الحكاية.
دارت المكالمة كالتالى:
- بنك (...) السلام عليكم ورحمة الله وبركاته
- وعليكم السلام ورحمة الله وبركاته .. كنت عايز اسأل عن قرض السيارة
- مرابحة يا فندم ..
- ايوة ... سورى .. مرابحة ... ايه التفاصيل من فضلك؟
- هتجيب عرض اسعار بالعربية اللى عايزها من اى معرض او توكيل تحبه
بعدها سألتنى عن مفردات مرتبى وذكر الأوراق المعتادة المطلوبة (جواب من الشركة
بمفردات المرتب وصورة البطاقة وايصال كهربا .. إلخ) وحين علمت عنوان سكنى قالت:
- كده اقرب فرع "اسلامى" لك فى الجيزة
- مافيش حاجة فى الرماية او اكتوبر
- فيه بس مش "اسلامى"
- (كنت هقول استغفر الله العظيم بس مسكت نفسى) طب لو انا عايز 100 الف جنية اسددها
على 5 سنين القسط كام؟
- 2333 جنية فى الشهر
- يعنى ال 100 الف يرجعوا كام بعد سداد كل الأقساط؟
- 140 الف جنية
- وكده الفايدة كام؟
- لأ يا فندم دى مرابحة مافيش فايدة .. حضرتك هتاخد العربية كسلعة، البنك
هيشتريهالك من المعرض ويبيعهالك تانى بنسبة ربح معينة (السيستم) بيحسبها
- هو السيستم (اسلامى)؟
- ايوة يا فندم مظبوط فيه شروط المرابحة الشرعية
- طب والعربية بتبقى باسمى عادى؟
- ايوة بس فيه حظر بيع طول الخمس سنين لحد ما تسدد كل الأقساط
قفلت معاها شاكرا اياها ... وقوام اتصلت ببنك آخر (علمانى) ... ودار الحوار
التالى:
- بنك (...) صباح الخير
- صباح النور لو سمحت عايز اسأل عن قرض السيارة
دار بيننا تقريبا نفس الحوار حول الأوراق المطلوبة واقرب فرع بنك لمكان سكنى حتى
وصلنا لجزء المبلغ والأقساط:
- طب لو انا عايز 100 الف جنية اسددها على 5 سنين القسط كام؟
- 2420 جنية فى الشهر
- يعنى ال 100 الف يرجعوا كام بعد سداد كل الأقساط؟
- 145 الف و 200 جنية
- وكده الفايدة كام؟
- 9%
- طب والعربية بتبقى باسمى عادى؟
- ايوة بس فيه حظر بيع طول الخمس سنين لحد ما تسدد كل الأقساط
إتصلت ببنكان (علمانيان) آخران فكانت الردود واحدة فيما عدا اختلاف الفائدة
وقيمة القسط اختلافات بسيطة ..
طب ايه الخلاصة ؟؟؟
الخلاصة ان المرابحة هى الشعار الكسبان والذى يظن البنك الفكسان انه يحقق الرواج
المطلوب، ولكنه لا علاقة له بالشريعة الإسلامية ولا احكامها ولا حاجة ... هى مجرد
تلفيقة لصياغة كلمة (قرض) الكخة الأبيحة التى تعود للعهد الفاسد البائد الذى كان
يحارب الدين ويخالف الشريعة بنظم بنكه الشيطانية اللعينة.
طبعا لو كان طلعت حرب، رائد البنوك المصرية، حيا بيننا وسمع هذا الإستهبال
البنكى الذى لا يحترم الشعارات الدينية ويستغلها بصورة تجارية فجة، لحطم تمثاله
وغير اسم ميدانه وقال لنا: هذه النظم البنكية من صنعكم انتم ايها المنافقون وليس لى
اى فضل فى تأسيسها.
ولأوضح ايضاً لنا إن البنك مش سمسار عربيات، يروح يشترى العربية اللى العميل
منقيها ولافف على كعوب رجليه حتى يجدها، ويشتريها بداله ثم يعيد بيعها له عينى عينك
كده !!! ... الله، طب ما تسلف العميل عادى وتاخد منه نسبة فائدة، بدون نظام دقنك
منين يا جحا هذا الذى يفسر القرض بعد جهد بأنه مرابحة
.
موضوع: غاظنى إعلان البنك المصرى الشهير عن "مرابحة السيارة 
السبت سبتمبر 08, 2012 12:11 am
