- إيه إتاخرتى عليا ليه ؟؟؟ ومالك قالبة بوز كده؟
- شوية عيال جرابيع مش متربيين واقفين على ناصية الشارع يعاكسوا فى اللى رايحة
واللى جاية
- إييه؟ فين ده؟؟ وماكلمتينيش ليه طيب
- ما تقلقش انا قمت بالواجب ومسحت بكرامتهم الأرض
- نعععم ؟؟؟ وقفتى تتكلمى معاهم كمان !!!
- أتكلم معاهم ايه؟ بقول لك مسحت بكرامتهم الأرض انا وكام بنت تانيين اتعاكسوا قبلى
- لا والله ؟؟؟ ما كنتش اعرف ان خطيبتى شضلية وبتاعة خناقات كده
- خناقات اييه؟ ... بقول لك عيال بيعاكسونى ... اسكت لهم يعنى
- ماهم ليهم حق
- نعم يا حبيبى ؟؟
- ماهو اللى انتى لابساه ده مستفز بصراحة
- مستفز ايه؟؟ هو انا لابسه مايوة ؟؟
- ألعن ..
- ايه اللى بتقوله ده ؟؟ ... طب ما البنتين اللى اتخانقوا معايا كان لبسهم غير لبسى
خالص، وفى وسط الخناقة ست منقبة دخلت معانا فى صفنا وفهمت منها انها ما بتسلمش من
المعاكسة برضه
- بقول لك ايه انا ماليس دعوة بباقى البنات والستات ... انتى بتجيبى لنفسك
المعاكسة، وانا ما اقبلش ان ..
- استنى هنا .. تقبل ايه وما تقبلش ايه ؟؟؟ هو مين الضحية هنا ؟؟؟ بقى الحيوان اللى
مايعرفش يتحكم فى نفسه هو الضحية دلوقتى !!!
- بصى انا عايزك تغيرى كل لبسك ده
- لأ مش هغيره ... ما هو انت حبيتنى واتقدمتلى وانا بلبسى ده، وعجبتك وانا كده ..
ايه اللى اتغير بقى ؟؟؟
- مش عيب اننا نغير فى بعض للأحسن
- ومين قال ان اللى انت شايفه احسن يبقى بالنسبة لى أحسن .. اللبس ده حرية شخصية.
- المثل بيقول: كل اللى يعجبك والبس اللى يعجب الناس
- يا سلااااام !!! ومادام المثل بيقول كده يبقى خلاص كلامه منزل .. طب ما المثل
بيقول الواد لخاله، وانت خالك ماحدش طايقه فى عيلتكوا كلها، يبقى انت كمان كده ؟؟
وكمان اللى يحاول يرضى كل الناس هيعيش محتاس
- ايه ده ؟؟ جبتيه منين المثل ده ؟؟
- هو انت لوحدك يعنى اللى خبير امثال ... وبعدين لو كل واحد بقى فى حاله بدل ما
يقعد يشاور على الناس اللى حواليه ويقول ده صح وده غلط ما كانش ده بقى حالنا.
- هو انا كل ما اقول لك حاجة تردى عليا بمحاضرة .. ما تسمعى الكلام وانتى ساكتة
- اسمع الكلام وانا ساكتة ... ليه بقى خطبت واحدة فاصلة شحن ولا ايه ؟؟ انت مش كنت
بتقول زمان انا عاجبانى دماغك دى قوى، دلوقتى بعد كام شهر بقيت مش طايق كلامى !!
- خلاص خلاص .. كفاية بقى، هو كل مناقشة بخناقة
- تصدق عندك حق .... انا فعلا لازم اسمع كلامك
- بجد ؟؟
- ايوة .. كلامك على عينى وراسى .. كفاية فعلا .. عندك حق ... مع السلامة
موضوع: - إيه إتاخرتى عليا ليه ؟؟؟ 
السبت سبتمبر 08, 2012 12:13 am
