خير اللهم اجعله خير

خير
اللهم اجعله خير ... بقالى مدة كده بسمع جملة و احدة من كل الولاد "لا لا لا أنا مش
حتجوز مصرية" ... و يفضل يعد و يرص الأسباب المختلفة و المتعددة لهذا القرار
المدروس بعد خبرة طويلة (قال يعنى ... بس ماشى)
وبغض النظر عن أن الأجنبية حتبصل له على ايه ؟ حيث أن الشاب المصرى معروف بحسن
الطلة (القرد فى عين أمه غزال) و الشعر الطويل الجميل (كريم ما يجيش حاجة جنبهم)
والرومانسية ما يتحكاش عليها (كل بنات فرنسا و إيطاليا على كلمة و احدة ما خدش غير
مصرى يا بابا ما خدش غير مصرى يا بابا) .. ده غير الإضافات اللى ملهاش لازمة اللى
البنت المصرية كبدى عليها بتلبس فيها مع الجوازة كده ك offer وهى تتضمن : أمه
الرخمة و أخواته الرذلين و كل صحابه و شلته و بنت الجيران او بنت خاله اللى كانت
امه عايزة تجوزيها له بس فشلت.

برده بعد كل ده قلت اقعدى فكرى يا بنتى، يعنى بعد العيوب دى و فاكرين ان أجنبية
حتبصلهم اكيد العيب فينا ... ماشى فلنستمع للآخر كما تقتضى الديموقراطية.

مشكلتك يا سيدى :
• أول حاجة تطلع من بقهم ان الأجنبية مش حتطلب شقة و عفش وسفرة ونيش والحوارات دى
... ماشى يا فندم ما قلتش لأ بس دى مشكلة إجتماعية أصلها الفشخرة، يعنى ما انت برده
لو اتجوزت اجنبية حتفضل زى الأهبل تفرجها لكل عيلتك ولا كأنها عربية جديدة.

و بعدين محدش ينكر انه فيه حالياً عائلات كتير بتساعد العريس لما تلاقى ان هو بنى
آدم كويس، بدليل ان فيه ولاد كتير أعرفهم بيتلقوا مساعدات مالية من اهالى مراتتاتهم
سواء بصورة مباشرة و منتظمة أو فى صورة مش مباشرة ... و الاهالى ابتديت تتعاون مع
الشباب ... اه مش حاجة ثابتة بس ليه تروح للى مش عايزاك و لا شارياك، و فى غيرها
شارياك ... سورى بس ما ترميش سوء اختيارك على البنت المصرية.

• ثانياً يقولك أصل البنت الاجنبية مش حتتخن و حتبقى رومانسية و مستقلة و كلام كبير
كده ... طبعاً الكلام ده غاية فى السطحية و الخطأ. مش كل بنات مصر بتتخن، على الأقل
فى هذه السنوات القليلة الماضية، وبعدين لو تخنت قولها خسى مش حوار يعنى ... ما
الولاد المصريين بعد الجواز ما شاء الله كرش و صلعة و محدش بيجرح أحساسكم بحاجة
خلوا فيه دم.

اما بالنسبة لموضوع الرومانسية فهذا كذب و افتراء، يعنى بذمتك البنت المصرية مهما
حصل فيها مش بتتهان و تتمرمط قد الاجنبية اللى بيطلع بوزها من و هى عندها 15 سنة
... أضف إلى ذلك انها جايالك ب list فى 5 أو 6 قبلك جرحوها او هى جرحتهم ففكرة أنك
one and only اللى بتعيشك فيها البنت المصرية دى باى باى.

موضوع بقى مستقلة ده حيطلع عينك انت فيه، لأنك مجرد شخص فى حياتها يعنى بيك من غيرك
كول و الحياة ماشية، حتمشى عدل اهلاً و سهلاً حتيجى كده و لا كده مع نفسك و على رأى
شاكيرا I love you for free and I am not your mother.

وبغض النظر عن الأسباب اللى بيتهأ للشاب المصرى أنه بسببها حرم نفسه على الفتيات
المصريات ... أعتقد أنها راجعة لأسباب لا شعورية، unconscious reasons، وهى كالآتى:

- أول سبب هو الصورة الذهنية أو ال mental image بمعنى أن مفيش بنات مصريات مشهورات
بيمثلوا icons ... كلهم كويسين معقولين كده، يعنى مفيش الإبهار أو ال glamour بتاع
بنات بره و فنانتها، فسيادتك عايز الصورة اللى العالم رسمهالك اللى بيقولك عليها
that's how she should be ..

بدليل ان خير اللهم اجعله خير فجاة كده المصريين حبوا البنت الرفيعة بعد ما كانت
فتاة أحلامهم هياتم.

- ثانياً و ده الأهم، ان حضرتك واخد على دماغك فى بلدك (متنكسفش كلنا لها) فحتفضل
باصص للأعلى منك، يعنى حيفضل على ابن الجناينى اللى بيحلم بإنجى بنت الباشوات،
والهندى يحلم يتجوز إنجليزية و الأمريكى يحلم بالفرنسية و البنت kate تحلم ب
William و هكذا ......

طبعاً أنا مش كاتبة الكلام ده عشان أحنن قلب شباب مصر على بناتها بالعكس ابسلوتلى،
الفكرة فى المبدأ نفسه اللى محسسنى أنكم بتنأوا بأنفسكم عن المصريات !!

مع أن كل و احد بيتجوز أجنبية عارف كويس هو بيتنازل عن ايه، البنت المصرية تشرب
القرف كله و لو اتخطبت قبل كده يحسسها بأنها غلطت مع طوب الأرض، ويتجعص أوى و هو
بيقول لمامته مش عايز و احدة اتخطبت قبلى ... مع انه لو اتجوز اجنبية ما بيجرؤش
يسألها عن ماضيها عشان ما يتشلش.

ده غير طبعاً اللى بتشوفه المطلقات عشان يا عينى اتجوزت مرة و اتسابت ياللعار
ياللهول! ... السافلة الفاجرة.

بالإضافة ً إلى المعاملة اللطيفة اللى حتعاملها البنت الأجنبية لأهلك و ازاى حتربى
بناتك، ومليون ألف تفصيلة انت حتفضل مطاطى راسك فيها معاها.

فما تنسوش المنتج التركى والمكسيكى مالى السوق وplease ما تعملوش على أهالينا رامبو
و فى النهاية تطلعوا كنتاكى فرايد تشكين
.

» اللهم هذي عشرك
» اللهم أرزق هذا الغالي
» اللهم انا نسالك بسجودنا
» اللهم انا نسالك ان تغفر لنا
» اللهم اجعل ايامها شبيهة بها