كلمات اغنية الحلوه لسه صغيره

الحلوه لسه صغيره .. صغيره
عالحب لسه صغيره .. صغيره
شافت منام .. ولا في المنام
فتحتلوا باب المندره
اداها حتة سكره .. سكره
طارت فى دنيا منوره .. منوره
تاهت معاه .. والحلم تاه
رجعت للدنيا تقول يارتنا ياريتنا فضلنا جوه المندرة

زوقيني يا لمونة زوقيني
زحلقيني فوق صابونه فرجيني
فرجيني الدنيا الحلوة فرجيني
دوخيني يا لمونه دوخيني

لا يا بنات انتوا لسه صغيرين
وانت دخلك ايه من فضلك
وكمان انت تطلع مين
عموا حزمبل .. فاعل خير
دايما احب اساعد الغير
طيب قولى ياعم حزمبل
انا راح اقولك سر خطير
بس السر ده بيني وبينك
قولى يابنتي السر في بير
عايزه افتح عيني واغمض القى سني بقى عشرين
علشان ايه
علشان اعجب شاب يكون خمسه وتلاتين
لا مش ممكن
علشان خاطرى بس ولو ليومين
لا يوم واحد بس بشرط .. تمشى معايا على طول الخط

بختك يابو بخيت .. الهمه يا جدعان
شدوا الشبكه ولموا .. خلوا الرزق يبان
صبرك حبه يا خال رزق الغيب ده حلال
يجى بطولة البال مش عايزه شيال
ولا محتاج خيال يجري وراه بحصان
بختك يابو بخيت
يا بحر الهوى يا حبيبى انا ..
انا كنت عايزة اجيلك بقالى كم سنه
بيقولوا انك قوى .. وبتجرح بالاوى
علمني .. علمني بس حاسب عليا من الهوى
يا بحر الهوى .. يا حبيبي انا

ياعم يا صياد قولى الحكايه ايه
مين العرايس دول مالهم حزانى ليه ؟
بحر الهوى غدار والخطوه فيه فدان
نزلوه فى ساعة شوق .. قبل الاوان باوان
متقولي يا صياد .. ايه الحكايه والبحر غدار ليه ؟؟

أهلاً أهلاً يا اهلين .. ست الحسن ونور العين
العصفوره دي طايره منين .. والاموره دي كانت فين
ست الحسن على الشطين

اهي دي الجنه اللى انا عايزاها
انا طول عمري باتمناها
الجنه دي جهنم حمره
كل الالوان دي دهب قشره
اسكت انت ..اش فهمك انت
يادي الداهيه يادي الندبه هتعقلي امتى
اقطع فرق العب .. طيب واللى هيكسب
اللى هيكسب يرمي ورقته
والعصفوره دي تبقى عروسته

اهو هوه ده
كله الا ده ..
انا عايزه من ده يا حزمبل
انا عايزه من ده ..
اهو ده اللى هيقدر يسعدني من كلمه واحده

بقى هوه الحب كده .. بقى هيا الدنيا كده
يا خسارة فرحتي .. يا خسارة ضحكتي
يا مين ياخدني تاني يرجعني لدنيتي

مش هوه ده اللى .. بقى هوه ده اللى
مش هوه ده .. ماهو هوه ده ..
هما ليه بقوا كده .. اصلهم هما كده
انا عارف بس ايه اللى جابك هنا
ما قلتلك تعالى معايا
كنت هتوديني فين
البحر بتاعنا
بس البحر بتاعكم ده بعيد قوي
ماحنا كنا هنوصل مسافة ما حكيلك حدوته
حدوتة ايه ..
حدوتة العصفور والبلبل
اليوم خلص
اخص عليك والنبي يا حزمبل !!
اليوم خلص
سيبه يقولى حكاية البلبل
اليوم خلص
انا حبيته والنبي يا حزمبل
سيبه يقولى حكاية البلبل !!

الحلوه لسه صغيره .. صغيره
عالحب لسه صغيره .. صغيره
شافت منام .. ولا في المنام
فتحتلوا باب المندره
اداها حتة سكره .. سكره
طارت فى دنيا منوره .. منوره
تاهت معاه .. والحلم تاه
رجعت للدنيا تقول يارتنا ياريتنا فضلنا جوه المندرة